Escola Galega de Administración Pública

RESOLUCIÓN do 19 de xaneiro de 2017 pola que se publica o Plan de formación e o programa de autoformación para o ano 2017 do persoal das administracións territoriais, institucionais e entes instrumentais do sector público da Comunidade Autónoma, así como do persoal da Administración de xustiza de Galicia e da administración e servizos (PAS) das tres universidades galegas.

[sc name=»plataforma» ]

O artigo 15 da Lei 2/2015, do 29 de abril, do emprego público de Galicia, ao establecer as funcións da consellería competente en materia de administracións públicas, sinala na súa letra c) que lle corresponden as relativas á formación dos empregados públicos da Administración xeral da Comunidade Autónoma de Galicia e das entidades públicas instrumentais do sector público autonómico.

Cumprindo co establecido neste mandato legal, o plan de formación da Escola Galega de Administración Pública –en diante EGAP– para o ano 2017 recolle as actividades formativas dirixidas a estes colectivos. Desta forma comprende o persoal ao servizo da Administración xeral da Comunidade Autónoma, ao persoal ao servizo da Administración de xustiza de Galicia, ao persoal ao servizo das entidades locais de Galicia, ao persoal dos entes instrumentais do sector público autonómico e das institucións públicas autonómicas e ao persoal de administración e servizos (PAS) das tres universidades galegas (UDC, USC e Uvigo).

O plan recolle o conxunto de accións estratéxicas para a formación e actualización profesional dos empregados públicos da Comunidade Autónoma a través dunha oferta ampla e variada coa que mellorar a súa cualificación e capacitación profesional. O feito de aglutinar a formación destinada aos distintos colectivos de empregados públicos nun único instrumento constitúe unha acción pioneira, coa que se pretende dotar de unidade e coherencia ao conxunto da oferta formativa.

Para a elaboración do plan tomáronse en consideración as necesidades formativas dos diversos colectivos aos que este instrumento se dirixe. Por este motivo participaron na programación as distintas consellerías da Xunta de Galicia, a Dirección Xeral de Xustiza, a Dirección Xeral de Administración Local, os entes instrumentais do sector público autonómico, as institucións públicas autonómicas e as tres universidades de Galicia. Ademais, colaboraron no seu deseño os coordinadores de formación de cada centro directivo, docentes e expertos de distintas disciplinas e os propios destinatarios da actividade formativa da escola, que coas súas suxestións contribúen a facer do plan un instrumento efectivo para o avance continuo.

Así mesmo, a avaliación dos plans formativos, concibida como un proceso sistemático e permanente de recollida de información, é hoxe un dos alicerces nos cales se sustenta o modelo formativo da EGAP. Este permite mellorar a programación dos cursos, adecuar as actividades ás necesidades e expectativas dos usuarios, mellorar a calidade das actividades incluídas no plan e, en último termo, reforzar a transparencia, a rendición de contas e o control de resultados. Ademais, para a súa configuración, tívose en conta a demanda real rexistrada nos cursos. Estas son as ferramentas chave que permitiron a creación dun programa de calidade e adecuado aos requirimentos dos usuarios.

Como resultado do anterior, a EGAP elabora para o persoal da Administración autonómica un plan de formación estruturado en accións formativas de carácter transversal e específico. As primeiras teñen por obxecto ofrecer un currículo básico horizontal que capacite os empregados públicos para realizar as funcións que son xenéricas e que constitúen as bases da organización da Administración. Por outro lado, as accións formativas específicas comprenden o conxunto de actividades cuxo obxectivo está directamente relacionado coa adaptación permanente ao posto de traballo, incluíndo contidos sectoriais relativos a competencias concretas. Para este colectivo increméntanse, de maneira significativa, tanto o número de edicións como de prazas, sobre todo na formación específica, atendendo á ampla demanda realizada.

Preséntase unha oferta formativa dirixida ao persoal ao servizo das entidades locais de Galicia co obxectivo de achegar contidos de importancia para a mellora da cualificación e capacitación profesional dos empregados públicos que desenvolven o seu labor neste ámbito, atendendo ás súas necesidades concretas e particulares. A súa formación contribúe decisivamente á modernización deste nivel administrativo, á súa xestión e á prestación duns servizos de calidade nun marco de proximidade á cidadanía.

A formación específica ofrecida ao persoal ao servizo da Administración de xustiza redunda nunha maior axilidade e eficacia no funcionamento da Administración, que resulta especialmente relevante no ámbito da xustiza, tal e como demanda a sociedade actual.

Por cuarto ano, intégrase no plan de formación da EGAP, a colaboración coas universidades galegas, dirixida ao avance da capacitación profesional do seu persoal de administración e servizos (PAS), mediante unha oferta formativa transversal impartida nas distintas modalidades docentes co fin de contribuír a mellorar a prestación dos servizos que teñen encomendados.

Continuarase co programa formativo dirixido especificamente ao persoal que presta os seus servizos na Administración institucional e nas entidades instrumentais do sector público de Galicia enunciadas no artigo 45 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia (Lofaxga), integrando este colectivo no plan de formación da EGAP.

Por último, o plan estrutúrase cun punto máis, o programa de autoformación. Este ano o programa diríxese a todo o persoal ao servizo das diferentes administracións da Comunidade Autónoma, ofrecendo un amplo abano de cursos relativos a diferentes áreas formativas que facilitan a capacitación para o desenvolvemento eficiente de calquera posto de traballo. Ademais, esta formación facilita a posibilidade de acreditar a súa competencia mediante unha proba voluntaria que dá dereito a obter un certificado de equivalencia.

O plan volve apostar polos diferentes contornos de metodoloxía e de aprendizaxe, entre os que se atopan a autoformación, a teleformación e a docencia presencial. A aposta pola teleformación tradúcese nunha elevada porcentaxe de actividades formativas, da que constatamos as súas múltiples vantaxes. A EGAP vén traballando, así pois, nos últimos anos na consolidación dun espazo virtual de coñecemento, cunha formación en liña coa que o alumnado pode xestionar o seu proceso de aprendizaxe. Así pois, a pluralidade de formatos, modalidades e metodoloxías constitúe outra das liñas distintivas do plan, que ten o obxectivo de facilitar a formación continua por parte dos empregados públicos ao eliminar calquera posible barreira no acceso e promover a conciliación.

Queremos que o plan sexa tamén un instrumento que contribúa a promover a igualdade no seo das administracións, a eliminar os estereotipos de xénero e a evitar calquera forma de discriminación. Con este propósito, mantéñense as actividades formativas nesta materia e introdúcense novos contidos.

Polo demais, para 2017, a EGAP incrementa novamente a súa oferta formativa. Isto tradúcese nunha programación ampla, actualizada e compresiva de diferentes materias (lexislativas, idiomas, novas tecnoloxías, habilidades de comunicación…) sistematizadas en módulos formativos especificamente dirixidos a todos e cada un dos colectivos incorporados á súa formación. Para este ano 2017, increméntanse considerablemente tanto prazas como edicións, o que implica un esforzo orzamentario notable xustificado no indispensable papel da formación dos empregados públicos para consolidar a Administración de calidade na que cremos e que requiren os cidadáns.

En todo caso, a execución das accións especificadas no anexo a esta resolución levarase a cabo de conformidade co crédito orzamentario dispoñible e co estipulado en cada convocatoria. Quedan excluídas as actividades derivadas de cursos selectivos; os cursos superiores; as actuacións en colaboración; as xornadas, conferencias e seminarios; as actividades doutras administracións públicas (excepto as sinaladas) e as actividades de formación do persoal docente da Consellería de Cultura, Educación e Ordenación Universitaria e do persoal sanitario. A estes destinatarios dirixiranse convocatorias específicas de conformidade coa aprobación dos seus plans ou cos convenios que se asinen durante o ano 2017.

Feitas estas advertencias resta tan só sinalar que para acceder ás accións formativas recollidas neste plan os empregados públicos deberán formalizar a súa matrícula unha vez publicadas as correspondentes convocatorias no Diario Oficial de Galicia.

Este plan de formación foi aprobado polo Consello Reitor deste organismo autónomo na sesión do día 18 de xaneiro de 2017.

De acordo co exposto, publícase como anexo a esta resolución o Plan de formación para o ano 2017 do persoal ao servizo da Administración da Comunidade Autónoma, da Administración de xustiza de Galicia, das entidades locais de Galicia, dos entes instrumentais do sector público autonómico, das institucións públicas autonómicas e do PAS das tres universidades galegas, así como o programa de autoformación para este ano dirixido por vez primeira a todos os destinatarios mencionados.

Santiago de Compostela, 19 de xaneiro de 2017

Sonia Rodríguez-Campos González Directora da Escola Galega de Administración Pública

ANEXO Cursos da Administración autonómica

Cursos da Administración local

Cursos da Administración de xustiza

Cursos das universidades galegas

Cursos das entidades públicas instrumentais e institucións públicas autonómicas

Cursos de autoformación